Grunnlaget vart lagt alt i 1969, då Stortinget i samband med konsesjon for Aurlandsutbygginga gjorde vedtak om veg frå Aurland til Hol. I 1975 kom stortingsvedtaket om stamveg Oslo – Bergen via Sogn.
Vegen til Hol opna i 1974 og i 1984 var det gjennomslag på Flenjatunnelen.
Realiseringa av stamvegen har heile tida tilført kommunen noko nytt og positivt: veg til omverda, utfyllinga av A-feltet i Flåm, veg til Undredal og næringsområde i Gudvangen
Gudvangatunnelen utløyste store investeringar, både i Gudvangen med Fjordtell og ny butikk og bensinstasjon og i resten av kommunen. Alt i alt vart det i løpet av få år investert for kring 100 millonar kroner, mest knytt til service og reiseliv.
Biltrafikken auka sjølvsagt og det var sterk vekst i reiselivet.
I dag er det ein årsdøgntrafikk på over 2000, dei første åra var talet knapt 800.
Dåverande ordførar i Aurland sa mellom anna dette i samband med opninga 17. desember 1991:
- Dette er ein historisk merkedag for ein heil landsdel
- Det blir ei heilt ny tidsrekning. Kommunen er samla og me har ferjefritt samband til Bergen
- Gudvangatunnelen – den lengste tunnelen i Nord Europa er eit praktarbeid
- Framfor oss ligg mulegheiter for utvikling og samarbeid. Lat oss samarbeida om det positive, då overvinn me det negative
Osvald Turlid var ordførar i 1991, ein forkjempar for gode samferdsleløysingar og næringsutvikling.
- Eg er glad for at Osvald er tilstades her i dag og kan ta i mot ei blomehelsing frå Aurland kommune.
Noralv Distad
ordførar