Ifølge regjeringa kan likevel omfattande korttidsutleige vere ein søknadspliktig bruksendring og kommunane sin terskel til å krevje søknad om bruksendring er lav. Det er til dømes ikkje eit krav om at det må skje vesentlege endringar i bygget for at det må søkjast om bruksendring. Det er nok at bygget vert teke i bruk til, eller tilrettelagt for, noko anna enn det som føl av løyve eller planen, eller dersom den endra bruken kan påverke forhold som plan- og bygningslova skal ivareta. Døme på slike forhold er omsynet til forsvarleg planløysing, helse, miljø og sikkerhet, parkeringsforhold, uteareal, tilkomst og teknisk infrastruktur.

Det er òg bruksendring dersom ein bustad eller leilegheit brukast til, eller vert tilrettelagt for, bruk som i større grad samsvarar med hotell-/næringsverksemd, og dette til dømes fører til auka trafikk, støy eller andre ulemper. Om utleiga skal vurderast som næringsverksemd eller ikkje, er avhengig av ei heilskapleg vurdering der blant anna omfanget, hyppigheita og varigheita av utleigeforholdet vil vere av betydning. Ifølge Skatteetaten er dette først og fremst aktuelt dersom utleigaren har fleire utleigeobjekt og/eller hyppige leigeforhold.

Dersom kommunen skal avslå søknaden om bruksendring må kommunen vise til ein klar avslagsheimel i plan- og bygningslova eller arealplan. Kommunen kan ikkje avslå søknaden berre på grunnlag av at dei har innvendingar mot den nye bruken.

Kommunen kan lage føresegn både i kommuneplanen og den enkelte reguleringsplanen som set restriksjonar på bruken av korttidsutleige. I det nye forslaget for områdeplanen for Undredal står det til dømes at bustadar skal nyttast til heilårsbustadar. Det har ikkje vore fokus på dette i tidlegare reguleringsplanar.

Kommunen har fått førespurnad og tips frå innbyggjarane. Dette vert følgt opp i tråd med gjeldande lovverk og kommunale avgifter etc. vert teken høgde for. Det er bygningsmyndigheitene som er avgjerdsmynde ved søknad og oppfølging av løyve til bruksendring. Det har vore søknadar om bruksendring til kommunen, men administrasjonen har ikkje høve til å uttale seg om enkeltsaker eller tal på saker.

Endringa i eigarseksjonslova i 2018 gjer at det ikkje er høve til å korttidsutleige ein bustad i meir enn 90 dagar i løpet av eitt år i eigarseksjonssameige.

Korttidsutleige vil vere eit av fleire tema som vert tatt opp i den bustadpolitiske handlingsplanen og eventuelle restriksjonar mot denne type utleige vil verte vurdert nærare der.